Kreditkortaviðhengi

Þessi leiðbeining lýsir öllu ferlinu fyrir kreditkortaviðhengi: frá því að tengja Business Central við bankann og sækja kort, þar til kortafærsla, kvittun og innkaupareikningur hafa verið yfirfarin.

Áður en hafist er handa

Kerfisstjóri eða starfsmaður sem ber ábyrgð á bankatengingum þarf að tryggja eftirfarandi:

• Fyrirtækið hefur aðgang að kreditkortunum hjá viðkomandi banka.
• Bankanotandinn hefur heimild til að sjá kortin og hreyfingar þeirra.
• Notandi sem vinnur kortafærslur er skráður með eigin bankaaðgang í Business Central.

Bankaaðgangur er persónulegur. Ef kort vantar við innflutning þarf að staðfesta hjá bankanum að bankanotandinn hafi aðgang að kortinu.

Tengja notanda við bankann

1. Leitaðu að Þínir RdN bankanotendur.
2. Veldu að stofna nýjan bankanotanda eða uppfæra núverandi tengingu.
3. Veldu bankaþjónustu, sláðu inn notandanafn og lykilorð bankans og ljúktu tengingunni.
4. Fyrir kreditkort hjá Íslandsbanka skaltu einnig ljúka innskráningu með rafrænum skilríkjum.

Sjá nánari leiðbeiningar um bankanotendur í Uppsetning bankanotenda.

Setja upp kreditkortaviðhengi og API-aðgang

1. Leitaðu að RdN Stillingar - Afstemming.
2. Virkjaðu Sækja kreditkortaviðhengi ef sækja á kvittanir sem korthafar hafa skráð í bankanum.
3. Veldu númeraraðir fyrir óbókaða og bókaða innkaupareikninga í flýtiflipanum fyrir kreditkort, ef þær eiga að vera aðrar en í almennri innkaupauppsetningu.
4. Fyrir Arion skaltu velja Setja Arion API-lykil og skrá lykilinn sem Rue de Net afhendir.
5. Fyrir Landsbankann skaltu velja Setja LI API-lykil og skrá lykilinn sem bankinn afhendir.

Ekki deila API-lyklum í lýsingum, athugasemdum eða skjölum. Ef innflutningur tekst ekki skaltu staðfesta að réttur API-lykill sé skráður og fá nýjan lykil frá bankanum ef þörf krefur.

Banki	Lýsing
Arion	Hafið samband við Rue de Net fyrir API-lykil.
Landsbanki	Hægt er að stofna aðgang og fá API-lykil í netbanka: fbl.is/adgangsstyring/kerfisadgangar eða hafa samband við Landsbankann.
Íslandsbanki	Opnið síðu Þínir RdN Bankanotendur og veljið skrá inn með rafrænum skilríkjum. Frekari leiðbeiningar hér

Sækja og stofna kreditkort

1. Leitaðu að RdN Kreditkort.
2. Veldu Flytja inn kreditkort.
3. Veldu kortin sem á að stofna og staðfestu stofnunina.
4. Opnaðu bankareikningsbókunarflokka þegar kerfið býður það og fylltu inn nauðsynlega bókhaldslykla fyrir nýju kortin.

Kerfið stofnar kreditkort, bankareikning og greiðslumáta fyrir hvert nýtt kort. Kort sem eru þegar til eru ekki stofnuð aftur.

Flytja inn kortafærslur og kvittanir

1. Opnaðu afstemmingarsíðuna og veldu bankareikning kreditkortsins.
2. Keyrðu innflutning færslna og veldu upphafs- og lokadagsetningu.
3. Yfirfarðu bókhaldslykil, upphæð, lýsingu og upplýsingar frá korthafa áður en innkaupareikningur er stofnaður.
4. Opnaðu viðhengið fyrir valda færslu til að skoða kvittunina þegar hún er tiltæk.

Þegar innflutningur viðhengja er virkur fylgir kvittun færslunni þegar hún er tiltæk hjá bankanum. Viðhengið getur einnig innihaldið flokk og athugasemd sem korthafi skráði.

Staða viðhengis

Staða	Merking
Niðurhalað	Kvittunin er tilbúin til notkunar.
Í bið	Beðið er eftir kvittun frá bankanum.
Mistókst	Ekki tókst að sækja kvittunina.
Ekki tiltækt	Bankinn getur ekki afhent myndina.

Vantar kvittun á ekki að stöðva stofnun innkaupareiknings. Stofnaðu reikninginn þegar aðrar upplýsingar eru tilbúnar og tengdu kvittunina síðar þegar hún berst.

Vinna með kreditkortavörpun

Vörpun tengir Auðkenni söluaðila á kortafærslu við lánardrottin í Business Central. Best er að stofna eða laga vörpun úr afstemmingunni. Þá birtast aðeins auðkenni söluaðila úr færslum valda kortsins, ásamt vörpun með * sem passar við eitt eða fleiri þeirra. Vörpun getur því verið yfirfarin án óskyldra söluaðila frá öðrum kortum.

1. Opnaðu afstemmingu fyrir kreditkortið.
2. Opnaðu Kreditkortavörpun frá bankafærslunum.
3. Finndu söluaðilann með Auðkenni söluaðila og veldu réttan lánardrottin.
4. Virkjaðu sjálfvirka stofnun innkaupareiknings ef allar framtíðarfærslur frá þessum söluaðila eiga að stofna reikning sjálfkrafa.

Ný vörpun sem þú stofnar úr afstemmingunni á við um öll kort. Hún er almenn vörpun og hentar þegar sami lánardrottinn á að gilda óháð því hvaða kort var notað.

Veldu Gera kortasértækt þegar sami söluaðili á að tengjast öðrum lánardrottni fyrir þetta kort.

Notaðu Setja sjálfgefinn lánardrottin korts þegar allar færslur á kortinu eiga að fara á sama lánardrottin.

Til að sameina færslur þar sem viðbót aftan á auðkenni söluaðila breytist skaltu setja * aftast í gildið, til dæmis ICELANDAIR*. Vörpunin gildir þá fyrir öll auðkenni sem byrja á ICELANDAIR. * eitt og sér er ekki leyft. Nákvæm vörpun hefur alltaf forgang fram yfir *-vörpun. Forgangsröðin er:

1. Nákvæm kortasértæk vörpun.
2. Kortasértæk vörpun með *.
3. Sjálfgefinn lánardrottinn korts.
4. Nákvæm almenn vörpun fyrir öll kort.
5. Almenn vörpun með * fyrir öll kort.

Stofna og yfirfara innkaupareikning

Þú getur stofnað innkaupareikning fyrir valdar færslur eftir yfirferð, eða fyrir allar færslur sem uppfylla skilyrði sjálfvirkrar stofnunar.

1. Yfirfarðu færslur, lánardrottin, bókhaldslykil, upphæð og kvittun.
2. Stofnaðu innkaupareikning fyrir valdar færslur eða keyrðu sjálfvirka stofnun fyrir færslur með tilbúna vörpun.
3. Opnaðu reikninginn, yfirfarðu línur og viðhengi og bókaðu hann samkvæmt hefðbundnu innkaupaferli.

Ef kvittunin er tilbúin fylgir hún innkaupareikningnum sem viðhengi. Kerfið stofnar ekki tvítekinn innkaupareikning fyrir sömu kortafærslu.

Tengja kvittun eftir á

Þegar innkaupareikningur var stofnaður áður en kvittun varð tiltæk skaltu fyrst staðfesta að staða viðhengisins sé Niðurhalað. Opnaðu síðan innkaupareikninginn og tengdu kvittunina úr aðgerðum reikningsins. Ekki þarf að tengja viðhengið aftur ef það er þegar á reikningnum.

Yfirferð áður en bókað er

• Staðfestu að réttur lánardrottinn komi frá vörpuninni.
• Staðfestu bókhaldslykil, lýsingu og upphæð.
• Staðfestu hvort kvittun sé til staðar eða hvernig hennar verður aflað.
• Staðfestu að innkaupareikningur hafi ekki þegar verið stofnaður fyrir færsluna.
• Bókaðu aðeins reikninga sem hafa verið yfirfarnir samkvæmt innkaupaferli fyrirtækisins.

Algeng frávik

Aðstæður	Hvað á að gera
Kort birtist ekki við innflutning	Staðfestu hjá bankanum að bankanotandinn hafi aðgang að kortinu.
Enginn lánardrottinn finnst	Bættu við eða leiðréttu vörpun fyrir söluaðilann.
Rangur lánardrottinn er valinn	Athugaðu hvort kortatengd eða sjálfgefin vörpun hafi hærri forgang.
Kvittun vantar	Bíddu eftir að staðan breytist eða reyndu að sækja myndina aftur; stofnaðu reikning þegar aðrar upplýsingar eru tilbúnar.
Sjálfvirkur reikningur verður ekki til	Staðfestu að vörpun, lánardrottinn og sjálfvirk stofnun séu tilbúin fyrir færsluna.