Senda greiðsluseðla á bak við kröfur í heimabanka
Formáli
Hægt er að senda greiðsluseðla, sem eru byggðir á kröfum, í formi PDF skjala til birtingar í heimabanka viðkomandi viðskiptamanna.
Til þess að þetta sé hægt þarf að ganga úr skugga um eftirfarandi:
- BankDocs, viðbót Rue de Net ofan á Bankakerfið, þarf að vera uppsett.
- Hafa þarf samband við sinn banka um að virkja innsendingar á PDF greiðsluseðlum fyrir allar þær kennitölur sem á að nota til sendinga. Bankinn mun svo koma þeirri beiðni áfram á Reiknistofu bankanna (RB), en hún heldur úti kerfinu sem sér um birtingu skjala í heimabankanum.
- Bankareikningar í BC sem notaðir eru í þessum tilgangi þurfa að vera tengdir við uppsetningu bankaþjónustu Arion, Íslandsbanka, Landsbankans eða Kviku (þ.e. vera af tegund "arion", "isb", "li" eða "kvika"), og settir upp með kennitölu sem notuð var í umsókninni að ofan.
Þegar greiðsluseðlar eru sendir fyrir tiltekinn kröfubunka er, líkt og þegar kröfuaðgerðir eru framkvæmdar, notast við bankareikninginn sem tekinn er fram í reitnum Innheimtuaðili á kröfubunka. Til að opna Uppsetningu Bankakerfis fyrir bankareikning er ýtt á aðgerðina Tengt > Uppsetning Bankakerfis á bankareikningsspjaldi.
Þá opnast RdN Bankareikningur síðan, en á henni má sjá reitina Kennitala og Uppsetning bankaþjónustu sem þurfa að vera rétt settir upp. Innsendingarnar þarf að sækja um fyrir þá kennitölu sem tekin er fram í Kennitala reitnum og er hún þá notuð sem kennitala sendanda rafrænu skjalanna.
Þegar listinn á bak við Uppsetning bankaþjónustu er opnaður opnast síðan sem sjá má á myndinni að neðan, þar sem Tegund þarf að vera "arion", "isb", "li" eða "kvika".
Senda greiðsluseðla sjálfkrafa við framkvæmd aðgerða
Undir Sjálfvirkni > Greiðsluseðlar krafna í bankann á síðunni Stillingar - RdN Kröfur er að finna stillingar sem tengjast þessari virkni.
Þar er hægt að haka við reitinn Senda greiðsluseðla með kröfum en þá sendast greiðsluseðlar á bak við kröfur í bankann í sömu atrennu og þær eru stofnaðar í bankanum við framkvæmd kröfuaðgerða. Ef villur koma upp hér eru þær gripnar til að trufla ekki framkvæmd kröfuaðgerðanna, en upplýsingar um villurnar vistast í sérstakri aðgerðasögu í staðinn.
Ef hakað er í Hlaða niður sendum greiðsluseðlum hleðst zip skráin sem send var til bankans og innihélt greiðsluseðlana einnig niður á tölvu notanda.
Hámarksfjöldi í þjappaðri skrá er samnýttur reitur milli greiðsluseðla og reikninga og er notaður til að skipta þeim greiðsluseðlum sem á að senda upp í zip skrár. Sjálfgefið gildi er 50 ef ekkert er tekið fram í þessum reit.
Loks er hér hægt að opna aðgerðasögu sendingartilraunanna (sjá nánar að neðan).
Senda greiðsluseðla með aðgerð á kröfubunkaspjaldi
Hægt er að senda greiðsluseðla á bak við kröfur handvirkt með til þess gerðri aðgerð á kröfubunkaspjaldi: Senda greiðsluseðla í bankann. Einnig er aðgerð á sömu síðu í kröfulistanum undir aðgerðahópnum Lína: Senda valda greiðsluseðla í bankann.
Á kröfubunkaspjaldi má sjá reitinn Allir greiðsluseðlar sendir í bankann. Hann segir til um hvort tekist hafi að senda alla greiðsluseðla eða ekki með því að segja til um hvort aðgerðasögulína merkt sem "Tókst" sé til fyrir allar kröfur í bunkanum. Ef ýtt er á gildið í þessum reit opnast aðgerðasagan fyrir þennan bunka.
Loks má sjá innheimtuaðilann, sem er bankareikningurinn sem þarf að vera rétt settur upp eigi þetta að virka.
Aðgerðasaga greiðsluseðla krafna í banka og staða skjala
Upplýsingar um tilraunir til sendinga á greiðsluseðlum krafna til heimabanka má finna á síðunni RdN Aðgerðasaga greiðsluseðla krafna í banka. Eins og áður segir er hún aðgengileg á kröfubunkaspjaldinu í gegnum gildið á reitnum Allir greiðsluseðlar sendir í bankann eða í gegnum Opna "Greiðsluseðill í banka" logg... undir Sjálfvirkni > Greiðsluseðlar krafna í bankann á síðunni Stillingar - RdN Kröfur.
Fyrir hverja tilraun til sendingar má þar sjá stöðu tilraunar (hvort allir greiðsluseðlar hafi senst rétt, sumir eða engir) og niðurbrot á greiðsluseðlum krafna í tilraun.
Ef ýtt er á kenni tilraunar opnast svo spjald þeirrar tilraunar.
Ýmsar aðgerðir eru í boði á síðunum. Til dæmis er hægt að reyna tilraun aftur fyrir greiðsluseðla á villu, annað hvort alla á villu í tilrauninni eða valda á villu í gegnum Greiðsluseðlar krafna í tilraun. Við það verður til ný aðgerðasögufærsla fyrir nýja tilraun.
Nánari lýsingu á einstaka reitum og aðgerðum má sjá hér
Fyrirvari um stöðu skjala
Athugið að ef skjal er merkt sem sent er því miður ekki þar með sagt að það hafi komist alla leið til heimabanka heldur einungis að tekist hafi að senda það til vefþjónustumillilags viðeigandi banka.
Þá á bankinn eftir að senda skjölin áfram á Reiknistofu Bankanna (RB) sem vinnur loks enn frekar úr þeim með sinni eigin villuleit.
Ef skjölin komast alla leið til birtingarkerfis RB fær sá sem er skráður fyrir póstum þeirra megin staðfestingu og niðurbrot á innlestri skjalanna. Uppfærð skjöl eru þau skjöl sem lesin hafa verið oftar en einu sinni ef einhver eru. Ef greiðsluseðill hefur áður verið sendur til viðkomandi þá er hann yfirskrifaður í staðinn fyrir að hann birtist tvisvar í heimabanka viðkomandi.
Sleppa virkni fyrir einstaka viðskiptamenn
Hægt er að slökkva á þessari virkni fyrir einstaka viðskiptamenn með reitnum Sleppa greiðsluseðlum krafna í banka undir Almennt á viðskiptamannaspjaldi. Tekið er tillit til þess reits niður á kröfu fyrir viðskiptamanninn sem tekinn er fram í kröfureitnum Reikn. færist á viðskm.